‘ಲವ್‌ ಮಾಕ್‌ಟೇಲ್‌’ ಸಿನಿಮಾದಿಂದ ದೊಡ್ಡ ಯಶಸ್ಸು ಕಂಡ ಮಿಲನಾ ನಾಗರಾಜ್‌ ಮತ್ತು ಡಾರ್ಲಿಂಗ್ ಕೃಷ್ಣ ಈಗ ವೈವಾಹಿಕ ಜೀವನ ಆರಂಭಿಸುತ್ತಿದ್ದಾರೆ. ಇದೇ ಫೆಬ್ರವರಿ 14ರಂದು ಡಾರ್ಲಿಂಗ್ ಕೃಷ್ಣ ಹಾಗೂ ಮಿಲನಾ ನಾಗ್ರಾಜ್ ದಾಂಪತ್ಯ ಜೀವನಕ್ಕೆ ಕಾಲಿಡಲಿದ್ದಾರೆ. ಈಗಾಗಲೇ ಮದುವೆ ಶಾಸ್ತ್ರಗಳೆಲ್ಲಾ ಶುರುವಾಗಿದ್ದು, ನಿನ್ನೆ ರಾತ್ರಿ ಮಿಲನಾ ನಾಗ್ರಾಜ್ ತವರೂರು ಹಾಸನದಲ್ಲಿ ಇಬ್ಬರ ಮದರಂಗಿ ಶಾಸ್ತ್ರ ನೆರವೇರಿದೆ.
ಹಾಸನದ ನಂದಗೋಕುಲ ಕನ್ವೆನ್ಷನ್ ಸೆಂಟರ್‌ನಲ್ಲಿ ಸ್ನೇಹಿತರು, ಕುಟುಂಬಸ್ಥರ ಜೊತೆ ಮೆಹಂದಿ ಕಾರ್ಯಕ್ರಮ ನಡೆಸಿದ್ದಾರೆ. ಕೃಷ್ಣ-ಮಿಲನಾರ ಹೆಸರಿನ ಶಾರ್ಟ್ ಫಾರ್ಮ್ ಬಳಸಿ, ಇವರಿಬ್ಬರ ಮದುವೆಗೆ ‘KrissMi ವೆಡ್ಡಿಂಗ್ ಅಂತ ಹೆಸರಿಟ್ಟಿದ್ದಾರೆ.
ಮೆಹಂದಿ ಸಡಗರದ ಫೋಟೋಗಳನ್ನು ಮಿಲನಾ ಮತ್ತು ಕೃಷ್ಣ ಅವರು ತಮ್ಮ ಸೋಶಿಯಲ್‌ ಮೀಡಿಯಾ ಖಾತೆಗಳಲ್ಲಿ ಹಂಚಿಕೊಂಡಿದ್ದಾರೆ. ಅದನ್ನು ಕಂಡ ಅಭಿಮಾನಿಗಳು ಈ ಜೋಡಿಗೆ ಶುಭ ಹಾರೈಸುತ್ತಿದ್ದಾರೆ. ಭಾವಿ ಪತ್ನಿಯ ಕೈಗೆ ಸ್ವತಃ ಡಾರ್ಲಿಂಗ್ ಕೃಷ್ಣ ಅವರೇ ‘ಮದರಂಗಿ’ ಹಾಕುವ ಮೂಲಕ ಪ್ರೀತಿಯ ರಂಗು ಹೆಚ್ಚಿಸಿದ್ದಾರೆ. ತಮ್ಮ ಮದುವೆಯ ಪ್ರತಿ ಹಂತದ ಫೋಟೋ ಮತ್ತು ವಿಡಿಯೋ ತುಣುಕುಗಳನ್ನು ಅಭಿಮಾನಿಗಳಿಗಾಗಿ ಹಂಚಿಕೊಳ್ಳುತ್ತಿದೆ ಈ ಜೋಡಿ.
copying or reproducing the above content in any format without approval is criminal offence and will be prosecuted in Bengaluru court © ಸುವರ್ಣಾನುಡಿ
