“ಅಭ್ಯಾಸಕ್ಕೆ ಹೋಗಲೂ ಸಾಧ್ಯವಾಗುತ್ತಿಲ್ಲ” ಪೆಟ್ರೋಲ್​ಗಾಗಿ ಎರಡು ದಿನ ಕಾದು ಕುಳಿತ ಲಂಕಾ ಸ್ಟಾರ್ ಆಟಗಾರ

ಆರ್ಥಿಕ ಬಿಕ್ಕಟ್ಟಿನಿಂದ ಕಂಗಾಲಾಗಿರುವ ಶ್ರೀಲಂಕಾದಲ್ಲಿ ಕ್ರಿಕೆಟ್ ಆಟಗಾರರು ಕೂಡ ಪರದಾಡುವ ಸ್ಥಿತಿ ಉಂಟಾಗಿದೆ. ಜನ ಸಾಮಾನ್ಯರ ಜೊತೆಗೆ ರಾಷ್ಟ್ರೀಯ ಕ್ರಿಕೆಟ್‌ ತಂಡದ ಆಟಗಾರರಿಗೂ ಕೂಡ ಸಾಕಷ್ಟು ತೊಂದರೆಯಾಗಿದೆ. ಪೆಟ್ರೋಲ್‌ಗಾಗಿ ಎರಡು ದಿನ ಸಾಲಿನಲ್ಲಿ ನಿಂತಿದ್ದ ಬಗ್ಗೆ ಲಂಕಾ ಯುವ ಆಟಗಾರ ಚಮಿಕಾ ಕರುಣಾರತ್ನೆ ಹೇಳಿಕೊಂಡಿದ್ದಾರೆ.

ಖಾಸಗಿ ಮಾಧ್ಯಮದ ಜೊತೆ ಮಾತನಾಡಿರುವ ಚಮಿಕ ಕರುಣಾರತ್ನೇ “ಸತತ ಎರಡು ದಿನಗಳ ಕಾಲ ಸಾಲಿನಲ್ಲಿ ನಿಂತಿದ್ದಕ್ಕೆ ನನಗೆ ಪೆಟ್ರೋಲ್‌ ಸಿಕ್ಕಿದೆ. ಪ್ರಸ್ತುತ ತೈಲ ಬಿಕ್ಕಟ್ಟಿನಿಂದಾಗಿ, ನಾನು ನಿಯಮಿತವಾಗಿ ಕ್ರಿಕೆಟ್‌ ಅಭ್ಯಾಸಕ್ಕೆ ತೆರಳಲು ಸಾಧ್ಯವಾಗುತ್ತಿಲ್ಲ,” ಎಂದು ಅಳಲು ತೋಡಿಕೊಂಡಿದ್ದಾರೆ.

“ಏಷ್ಯಾಕಪ್ ಬರುತ್ತಿದೆ ಹಾಗೂ ಲಂಕಾ ಪ್ರೀಮಿಯರ್ ಲೀಗ್ ಕೂಡ ಇದೇ ವರ್ಷ ನಡೆಯಲಿದೆ. ನನಗೆ ಏನು ಆಗಲಿದೆ ಎಂದು ಹೇಳಲು ಆಗುತ್ತಿಲ್ಲ. ನಾನು ಕೊಲಂಬೊಕ್ಕೆ ತೆರಳಿ ಅಲ್ಲಿ ಅಭ್ಯಾಸ ನಡೆಸಿ ಕ್ಲಬ್ ಸೀಸನ್​ಗಳಲ್ಲಿ ಆಡಬೇಕಷ್ಟೆ. ಪೆಟ್ರೋಲ್​ಗಾಗಿ ಎರಡು ದಿನ ಸಾಲಿನಲ್ಲಿ ನಿಂತಿದ್ದೇನೆ. ಅದೃಷ್ಟದಿಂದ ಇಂದು ಸಿಕ್ಕಿತು. ಆದರೆ, ಇದು ಎರಡು ಮೂರು ದಿನಕ್ಕಷ್ಟೆ ಬರಬಹುದು,” ಎಂದಿದ್ದಾರೆ.

“ಪ್ರಸ್ತುತ ಇಲ್ಲಿನ ಸನ್ನಿವೇಶಗಳು ಸರಿಯಾಗಿಲ್ಲ. ಸರಿಯಾದ ವ್ಯಕ್ತಿಗಳು ಆಡಳಿತಕ್ಕೆ ಬಂದರೆ, ಒಳ್ಳೆಯ ದಿನಗಳು ಖಂಡಿತಾ ಬರುತ್ತವೆ. ಜನರು ಕೂಡ ಒಳ್ಳೆಯ ವ್ಯಕ್ತಿಯನ್ನು ಆಯ್ಕೆ ಮಾಡುತ್ತಾರೆಂಬ ಬಗ್ಗೆ ನನಗೆ ವಿಶ್ವಾಸವಿದೆ. ಅಂತಾರಾಷ್ಟ್ರೀಯ ಮಟ್ಟದಲ್ಲಿ ನೆರವು ಸಿಕ್ಕರೆ, ಖಚಿತವಾಗಿ ಸರಿಯಾದ ಹಾದಿಗೆ ನಾವು ತಲುಪುತ್ತೇವೆ,” ಎಂದು ತಿಳಿಸಿದ್ದಾರೆ.

copying or reproducing the above content in any format without approval is criminal offence and will be prosecuted in Bengaluru court © ಸುವರ್ಣಾನುಡಿ