ಓಟಿಟಿಯಲ್ಲಿ ಬಿಡುಗಡೆಯಾಯ್ತು ಕಾಂತಾರ! ವರಾಹರೂಪಂ ಹಾಡು ಸಂಪೂರ್ಣ ಬದಲು

ಕಾಂತಾರ ಸಿನಿಮಾ ಪ್ರಪಂಚದಾದ್ಯಂತ ಭರ್ಜರಿ ಪ್ರದರ್ಶನ ಕಂಡು ಬಾಕ್ಸ್ ಆಫೀಸ್ ಅನ್ನು ಧೂಳಿಪಟ ಮಾಡಿದೆ. ಇದೀಗ ಕಾಂತಾರ ಸಿನಿಮಾ ಓಟಿಟಿ ಪ್ಲಾಟ್ಫಾರ್ಮ್ ಗು ಕೂಡ ಲಗ್ಗೆ ಇಟ್ಟಿದೆ. ಆದರೆ ಕಾಂತಾರ ಸಿನಿಮಾವನ್ನು ಓಟಿಟಿಯಲ್ಲಿ ವೀಕ್ಷಿಸುತ್ತಿರುವ ಅಭಿಮಾನಿಗಳಿಗೆ ದೊಡ್ಡ ಮಟ್ಟದ ಬೇಸರ ತಂದಿದೆ. ಇದಕ್ಕೆ ಮುಖ್ಯ ಕಾರಣವೇನು ಗೊತ್ತಾ? ಇಲ್ಲಿದೆ ಸಂಪೂರ್ಣ ಮಾಹಿತಿ.

ಕಾಂತಾರ ಸಿನಿಮಾ ಸಕ್ಸಸ್ ಕಾಣಲು ಮುಖ್ಯ ಕಾರಣ ರಿಷಬ್ ಶೆಟ್ಟಿ ಅವರ ನಟನೆ. ಅದರಲ್ಲೂ ಕ್ಲೈಮಾಕ್ಸ್ ನಲ್ಲಿ ರಿಷಬ್ ಶೆಟ್ಟಿ ನಟನೆ ನೋಡಿ ಫಿದಾ ಆಗದೆ ಇರುವ ಮಂದಿ ಇಲ್ಲ. ರಿಷಬ್ ಶೆಟ್ಟಿ ಗೆ ಸಾಥ್ ನೀಡಿದ್ದು ವರಾಹರೂಪಂ ಹಾಡು. ಈ ಹಾಡು ಇಂದಿಗೂ ಸಹ ಅಭಿಮಾನಿಗಳ ಕಿವಿಯಲ್ಲಿ ಕೇಳಿಸುತ್ತಿರುತ್ತದೆ. ಆದರೆ ಇದೀಗ ಓಟಿಟಿಯಲ್ಲಿ ಬಿಡುಗಡೆಯಾಗಿರುವ ಕಾಂತಾರ ಸಿನಿಮಾದಲ್ಲಿ ವರಾಹರೂಪಂ ಹಾಡನ್ನು ಸಂಪೂರ್ಣವಾಗಿ ಬದಲಾವಣೆ ಮಾಡಲಾಗಿದೆ.

ಈ ಹಿಂದೆ ಕಾಂತಾರ ಸಿನಿಮಾದಲ್ಲಿ ಉಪಯೋಗಿಸಿದ್ದ ವರಾಹರೂಪಂ ಹಾಡನ್ನು ಥೈಕ್ಕುಡಂ ಬ್ರಿಡ್ಜ್‌ನ ವಿಯಾನ್ ಫೆರ್ನಾಂಡಿಸ್ ತಮ್ಮ ನವರಸಮ್ ಹಾಡಿನ ಕಾಪಿ ಎಂದು ಹೇಳಿದ್ದರು ಹಾಗೂ ಕೇರಳದ ಸ್ಥಳೀಯ ನ್ಯಾಯಾಲಯದಲ್ಲಿ ಹಾಡಿನ ವಿರುದ್ಧ ದೂರು ಕೂಡ ದಾಖಲಾಗಿತ್ತು ಮತ್ತು ಹಾಡನ್ನು ಉಪಯೋಗಿಸದಂತೆ ನ್ಯಾಯಾಲಯ ತೀರ್ಪನ್ನೂ ಸಹ ನೀಡಿತ್ತು. ಈ ಕುರಿತು ಕಾಂತಾರ ಸಿನಿಮಾ ತಂಡ ಕೂಡ ಕೇರಳ ಹೈಕೋರ್ಟ್ ಗೆ ಅರ್ಜಿಯನ್ನು ಸಹ ಹಾಕಿತ್ತು. ಆದರೆ ಇದೀಗ ಹೈಕೋರ್ಟ್ ಅರ್ಜಿಯನ್ನು ವಜಾಗೊಳಿಸಿದ್ದು, ಓಟಿಟಿಯಲ್ಲಿ ಬಿಡುಗಡೆಯಾದ ಕಾಂತಾರ ಸಿನಿಮಾದ ವರಾಹರೂಪಂ ಹಾಡು ಸಂಪೂರ್ಣ ಬದಲಾವಣೆ ಮಾಡಲಾಗಿದೆ.

ಇಂದಿನಿಂದ ಕಾಂತಾರ ಅಮೆಜಾನ್ ಪ್ರೈಮ್ ನಲ್ಲಿ ಪ್ರಸಾರವಾಗುತ್ತಿದೆ. ಆದರೆ ಕ್ಲೈಮಾಕ್ಸ್ ನಲ್ಲಿ ಬರುವ ವರಾಹರೂಪಂ ಹಾಡು ಸಂಪೂರ್ಣ ಬದಲಾಗಿದೆ. ಏಕೆಂದರೆ ಹಾಡಿನ ಸಾಹಿತ್ಯ ಅದೇ ಇದ್ದರು ಇದರ ರಾಗ ಮಾತ್ರ ಸಂಪೂರ್ಣವಾಗಿ ಬದಲಾವಣೆ ಮಾಡಿದ್ದು, ಸಂಗೀತ ಕೂಡ ಬೇರೆ ರೀತಿ ನೀಡಿದ್ದಾರೆ. ಹೀಗಾಗಿ ಚಿತ್ರಮಂದಿರದಲ್ಲಿ ವರಾಹರೂಪಂ ಹಾಡನ್ನು ಕೇಳಿಸಿಕೊಂಡ ಪ್ರೇಕ್ಷಕರಿಗೆ ಓಟಿಟಿಯಲ್ಲಿ ಪ್ರಸಾರವಾಗುತ್ತಿರುವ ವರಾಹರೂಪಂ ಹಾಡನ್ನು ಕೇಳಲು ಅಷ್ಟೇನೂ ರೋಮಾಂಚನವಾಗುತ್ತಿಲ್ಲ ಎಂದು ಹೇಳುತ್ತಿದ್ದಾರೆ.

copying or reproducing the above content in any format without approval is criminal offence and will be prosecuted in Bengaluru court © ಸುವರ್ಣಾನುಡಿ